خبر بفلوس
شركة فاليو للتمويل الاستهلاكي، اللي بتتبع المجموعة المالية هيرميس، بترتب إنها توصل بحجم مبيعاتها لـ 6 مليار جنيه بنهاية 2022، والشركة كمان قربت إنها تصدر بطاقة للدفع الإلكتروني خلال فترة قصيرة.
مبيعات قوية
أحمد عصام، رئيس قطاع التطوير في “فاليو”، قال إن الشركة بقت تغطي غالبية السلع والمنتجات، وأصبحت جذابة أكتر للعملاء، بسبب سهولة التعامل بيها.
“عصام” وضح إن مبيعات الشركة الشهرية، بتتراوح ما بين 400 لـ 550 مليون جنيه، وبيتم العمل حاليًا على الوصول لإجمالي مبيعات 6 مليار جنيه، بنهاية 2022.
إطلاق بطاقة للدفع الإلكتروني
“عصام” أضاف إن فاليو بتحط اللمسات الأخيرة في بطاقتها للدفع الإلكتروني، اللي بتخطط لإطلاقها بعد الحصول على موافقة البنك المركزي.
كارت فاليو هيساعد أكتر في إنتشار الشركة، ووصولها لعدد عملاء أكبر، والعميل هيقدر يستخدمه في كل عمليات الشراء.
