خبر بفلوس
نجحت شركة مدينة نصر، إنها تسجل مستوى حجوزات تاريخي في يوليو 2022 بقيمة 1.5 مليار جنيه، ودة بشكل كبير يرجع لإنطلاق مشروعات “إيلكت” “وتاج فيل”، الموجودين في “تاج سيتي”.
أصل الموضوع
الشركة قالت إن إطلاق أول مرحلتين من مشروع إيلكت، كان له دور كبير في المبيعات الضخمة دي، ودة لإن الشركة قدرت إنها تبيع 50% من إجمالي الوحدات في المرحلتين حتى الآن.
وفي بيان ليها، الشركة قالت إن من ضمن الأسباب الرئيسية لقفزة الحجوزات، هي مبيعات الوحدات الجاهزة للاستلام في مشروعات “كرونز” و”تافال”، اللي بيتبعوا مشروعها “سراي”.
وعلى الرغم من الوضع الاقتصادي الصعب، والتباطؤ اللي بيحصل في الصيف لسوق العقارات في منطقة شرق القاهرة، إلا إن الشركة قدرت تحقق المستوى القياسي دة في يوليو 2022.
إيه هو مشروع إيلكت؟
هو مشروع بيضم فيلات بتصميمات حديثة، وبيرتفع عن باقي وحدات “تاج سيتي” بحوالي 9 أمتار.
