خبر بفلوس
شركة برايم، اللي ماسكة طرح غزل المحلة في البورصة، قالت إنها بتبحث احتمالية دخول مستثمر استراتيجي، لتمويل زيادة راس مال الشركة لـ 200 مليون جنيه، وتأهيلها للقيد في البورصة.
تفاصيل
محمد ماهر، الرئيس التنفيذي لبرايم، قال إن اكتمال طرح غزل المحلة في البورصة، هيكون إما عن طريق دخول مستثمر استراتيجي، أو إنتظار صدور قوايم مالية حتى سنتين على الأقل، علمًا بأن الشركة إتأسست في يناير 2021.
في الخلفية
انتهت فترة الاكتتاب في طرح نادي غزل المحلة، بنسبة تغطية وصلت 17.9% فقط.
في عروض موجودة من مستثمرين
“ماهر” قال إن الشركة في الفترة اللي فاتت جالها عروض من مستثمرين خليجيين؛ علشان يشاركوا في زيادة راس المال، ولكن حرص غزل المحلة إنها تتيح الفرصة لأبناء المحلة للمشاركة، كان سبب تنفيذ الزيادة من خلال الطرح في البورصة.
