خبر بفلوس
وزارة المالية أصدرت قرارات جديدة بهدف تسهيل اجراءات الاستيراد في الموانئ، وكمان تفيف الأعباء عن المستثمرين.
إيه هي القرارات دي؟
في بيان لوزارة المالية، قالت إنها مش هتاخد غرامات جمركية من المستوردين، اللي بيتأخروا في إنهاء إجراءات الاستخلاص الجمركي بسبب المستندات المطلوبة من الجهات المختلفة.
القرارات تضمنت كمان إن يكون في مهلة 4 شهور للسلع الغذائية و 6 شهور للسلع الغير غذائية، قبل تصنيفها بـ “مُهمَل”.
إيه هو تصنيف “مُهمَل”؟
دة التصنيف اللي بيوصف السلع، اللي فضلت في الجمارك فترات أطول من المحددة، واللي ساعتها بيكون للجمارك الحق في التصرف بيها أو بيعها.
في الخلفية
مصر كانت ألزمت المستوردين بالعمل بطريقة الاعتمادات المستندية، بدل مستندات التحصيل، قبل تخفيف رئيس الجمهورية القيود دي على مستلزمات الإنتاج والمواد الخام.
ليه دة مهم
أحمد شيحة، عضو شعبة المستوردين في الغرفة التجارية، قال إن الكل منتظر الخطوة الجاية، واللي متوقع إنها تكون بخصوص العودة للعمل بمستندات التحصيل مرة تانية بدل الاعتمادات المستندية.
