خبر بفلوس
الشحات غتوري، رئيس مصلحة الجمارك، قال إن ممكن يكون في قرارات جديدة من البنك المركزي، لحل أزمة الاستيراد هتطلع خلال أيام.
أصل الموضوع
“غتوري” قال إن البنك المركزي ممكن يقرر فتح المستوردين لخطابات ضمان، في مقابل إن الشحنات المتراكمة في المينا يتم الإفراج عنها، لحد ما يقدروا يفتحوا اعتمادات مستندية.
إيه هي خطابات الضمان؟
هو باختصار إن البنك اللي موكله المستورد، يبعت خطاب بيقول فيه إنه ملتزم بدفع قيمة الاستيراد للجهة المحددة، مهما حصل.
ليه دة مهم
الإجراءات المطلوبة لفتح الاعتمادات المستندية كتيرة وصعبة، دة لإن العملية بتتضمن محادثات بين بنك المستورد وبنك المُصدِر، ودة تسبب في تأخير استلام المستوردين لبضايعهم.
الحكومة بتحاول التخفيف عن المستوردين وتسهيل الاستيراد، بعد ما كانت صعبت الموضوع؛ لحماية رصيدها من الدولار، اللي بيتم الاعتماد عليه للاستيراد.
