خبر بفلوس
اشترت الحكومة المصرية 120 ألف طن قمح روسي، هيتم شحنهم خلال نوفمبر 2022، وبسعر وصل لـ 340 دولار للطن.
تفاصيل
الصفقة دي تمت بشكل مباشر مع الموردين، بدل نظام المناقصات اللي مصر كانت شغالة بيه، فحوالي 55% من كمية القمح اللي مصر اشترتها خلال السنة المالية دي، كانت بشكل مباشر من التجار.
في الخلفية
في إبريل 2022، مصر كانت غيرت من سياسة شراء القمح عن طريق المناقصات بس، وسمحت لموردين القمح بتقديم عروض مباشرة، لهيئة السلع التموينية.
ليه دة مهم
عمليات الشراء المباشر بتدي للحكومة مرونة أكبر من المناقصات الدولية، لإنها بتمكنها من شراء كميات أقل من القمح، بسعر أقل.
أسعار القمح عامةً بدأت بالانخفاض، بعد ما كانت وصلت لـ 429 دولار للطن في بداية الحرب الروسية الأوكرانية، قبل ما ما الدولتين يعملوا اتفاق تاريخي، باستئناف تصدير الحبوب عن طريق البحر الاسود.
