دليلك لملخص السوق 

كل اللي محتاج تعرفه عن ملخص السوق من ثاندر.

كتير أوي بنسمع عن مؤشرات البورصة، ومؤشر EGX30 هو واحد منهم. هنا هنتعرف أكتر على معناه، والهدف منه ودلالته.

يعني إيه أصلًا مؤشر في البورصة؟
المؤشرات في سوق المال تم ابتكارها علشان تقيس أسعار الأسهم في السوق بشكل عام على أساس يومي، وفي أنواع ليها، زي مثلًا المؤشرات اللي بتكون الأسهم فيها، لها أوزان متساوية، بمعنى إن مفيش سهم ليه وزن أكبر من سهم.

أو مؤشرات تانية بتتحدد فيها أوزان الأسهم حسب قيمة الشركة السوقية. ووزن السهم بيتحدد، عن طريق مقارنته بباقي أسهم المؤشر.

إيجي إكس 30
هو المؤشر الرئيسي للبورصة المصرية، وبيسمى أيضًا بالمؤشر التلاتيني، وهو بيضم أعلى 30 شركة من حيث السيولة والنشاط في البورصة المصرية، وتقوم إدارة البورصة بتعديل الشركات المدرجة فيه، في عملية اسمها “المراجعة الدورية”، تتم كل 6 شهور، وفيها البورصة بتتضيف أسهم جديدة للمؤشر، وبتقوم بإخراج أسهم أخرى. 

مكونات مؤشر إيجي إكس 30:

إيجي إكس 70
مؤشر إيجي إكس 70 تم إطلاقه بعد إطلاق المؤشر الرئيسي إيجي إكس 30، والهدف منه كان التنويع في مؤشرات البورصة المصرية، وتوفير نظرة أوسع للمستثمر؛ علشان يتابع أداء السوق.

مؤشر إيجي إكس 70:

هنلاقي جنب إسم كل شركة حاجة اسمها رمز السهم، ودة باختصار رمز بيتم استخدامه لتعريف ورقة مالية معينة، في سوق معين، ودة اللي بيسهل عملية متابعة السهم والتعرف عليه.

أداء المؤشر بيتم قياسه بفترات زمنية مختلفة، منها “شهر حتى تاريخه”، ودة يعني أداء المؤشر من أول يوم في الشهر اللي احنا فيه، لحد دلوقتي. يعني مثلأً لو قلنا إن المؤشر حقق 8% شهر حتى تاريخه، واحنا في يوم 21 سبتمبر، دة معناه إنه من يوم 1 سبتمبر لحد دلوقتي، المؤشر حقق 8%.

من ضمن البيانات كمان اللي بيوفرها المؤشر هو نوع المستثمرين اللي قاموا بالتداول، فالمستثمر ممكن يكون مؤسسة أو فرد، وممكن كمان يكون مصري، عربي أو أجنبي.

كل يوم بيحصل جديد في السوق، فممكن في يوم يكون أغلب العمليات اللي نفذها المستثمرين العرب هي البيع، وفي يوم تاني يكون مجمل العمليات اللي نفذها الأجانب هي الشراء.

هتلاقي كمان توضيح لقيمة التداول اليومية، ودي باختصار بتبقى القيمة الإجمالية لعمليات البيع والشراء اللي حصلت في السوق، فلو كانت إجمالي عمليات البيع 1 مليون جنيه، وإجمالي عمليات الشراء 1 مليون جنيه، إذاً قيمة التداول هي 2 مليون جنيه.

هنلاقي كمان في الملخص اليومي للسوق سعر الصرف الدولار مقابل الجنيه، بس إيه هو سعر الصرف؟

باختصار سعر الصرف هو السعر النسبي لعملة بلد معينة، مقارنةً بعملة بلد تانية، يعني مثلًا USD/EGP= 19، معناه إن العملة الأمريكية، اللي هي الدولار، بتساوي 19 وحدة من عملة مصر، اللي هي الجنيه. باختصار، الدولار يساوي 19 جنيه.

لو سعر الصرف الدولار زاد، دة معناه إن الدولار بقى يساوي أكتر بالجنيه، ولو سعر الصرف قل، دة معناه إن الدولار بقى يساوي أقل بالجنيه.