خبر بفلوس
وزيرة التخطيط، هالة السعيد، قالت إنه من المخطط طرح 10 شركات حكومية قبل نهاية السنة، بقيمة إجمالية توصل لـ 6 مليار دولار.
أصل الموضوع
“السعيد” قالت إن طرح الشركات هيكون ما بين طرح في البورصة، أو طرح لمستثمرين استراتيجيين، ولكن الطرح مش هيعتبر تخارج من الحكومة أو بيع الشركات، هو بس لضخ رؤوس أموال جديدة في الشركات دي.
خطوات الطرح
الوزيرة قالت إن الطرح هيتم على مرحلتين، وقيمة الحصص المطروحة في المرحلة الأولى هتكون ما بين 2.5 لـ 3 مليار دولار، وقالت إن نسب الطروحات هتكون من 20%-30% من الشركات. دة بالإضافة لإنه هيتم الإعلان عن شركات الدفعة الأولى خلال شهر من دلوقتي.
ولكن
الوزيرة أكدت إن الطروحات متوقفة على أحوال الأسواق في العالم، وطبيعتها.
ودلوقتي
“السعيد” قالت إن بيتم التفاوض حاليًا مع عدد من المستثمرين الأجانب، علشان يدخلوا في الصندوق الفرعي، وبعدين هيتم تحديد الشركات اللي هتتطرح.
