خبر بفلوس
البنك المركزي بيشتغل على ربط نظام المدفوعات الروسي “مير” بشبكة الدفع الإلكتروني “ميزة”، في خطوة بتعكس اهتمام الحكومة بالاعتماد أكتر على الروبل، دة اللي قاله رئيس لجنة الخطة والموازنة في مجلس الشعب، فخري الفقي.
إيه هو نظام “مير”؟
مير هو نظام للدفع، بيسمح للدول إنها تتعامل مع البنوك الروسية، بدون الحاجة لنظام “سويفت”، وكمان بيوفر للمواطنين الروس الفرصة في الدفع، من غير الاعتماد على “فيزا” و “ماستر كارد”.
إيه فايدة الربط بـ “مير”؟
نظام الدفع “مير” مهم جدًا للسياحة، دة لإن السياح الروس هيقدروا يدفعوا بالروبل، باستخدام بطاقات الدفع، خاصةً بعد ما توقفت خدمات دفع “فيزا” و “ماستر كارد” عن العمل في روسيا بعد الأزمة مع أوكرانيا.
كمان، بمجرد ما النظام المصرفي في مصر يتربط بـ “مير”، مصر هتقدر تدفع ثمن السلع المستوردة من روسيا، زي القمح والزيت، بالروبل الروسي وده اللي هيخفف من الضغط على الدولار.
