خبر بفلوس
الاقتصاديين بيتوقعوا إنه يتم هيتم تسريع عملية تخفيض الجنيه خلال الفترة الجاية، وإنه هينزل لمستويات تاريخية، ودة هيكون تمهيد لاتفاق الحكومة مع صندوق النقد الدولي بخصوص القرض اللي مصر بتطلبه، بحسب تقرير سكاي نيوز.
إيه اللي بيحصل دلوقتي؟
الجنيه شهد عملية انخفاض سريعة في الفترة الأخيرة، لحد ما وصل لـ 19.4 جنيه للدولار، وقرب يكسر الحاجز التاريخي اللي وصله بعد تعويمه في 2016، لما سجل 19.51 جنيه.
وبسبب الخروج الكبير للعملة الأجنبية من مصر بعد الحرب الروسية الأوكرانية، فمن بداية 2022، الجنيه المصري فقد حوالي 23% من قيمته.
وبعدين
المحللين بيتوقعوا إن الجنيه هيوصل لـ مستويات 21-22 جنيه للدولار.
هاني جنينة، المحاضر في الجامعة الأمريكية، بيقول إن الإنخفاض مرة واحدة، أحسن في تأثيره من الإنخفاض التدريجي، لإن الإنخفاض مرة واحدة هيخلي المستثمرين المنتظرين الخطوة دي، يضخوا تدفقات أجنبية بسرعة، وكمان علشان تسريع الحصول على قرض صندوق النقد.
