خبر بفلوس
جلسة امبارح في البورصة المصرية حققت خساير كبيرة، المؤشر الرئيسي EGX30 هبط بنسبة 3.13% وهبط مؤشر EGX70 بنسبة 6%.
إيه اللي بيحصل
الهبوط الحاد بيتزامن مع انتظار المستثمرين أسعار الفايدة الجديدة اللي هيتم إعلانها بعد اجتماع البنك المركزي في آخر الاسبوع الجاري في مصر، واللي متوقع الإعلان عنها في أمريكا خلال الإسبوع دة برضه.
البورصة أصلًا في حالة هبوط من وقت إعلان حجم التضخم في أمريكا، واللي سجل 8.3% على أساس سنوي، في أغسطس 2022.
التضخم في مصر كان سجل في أغسطس 2022 أعلى معدل للتضخم في 4 سنين، ووصل لـ 14.6% على أساس سنوي.
ولكن
على الرغم من إن معظم الآراء بتقول إن الهبوط كان بسبب توقعات رفع الفايدة، صرح هاني جنينة، المحاضر في الجامعة الأمريكية، لـ “ثاندر كلابس” إنه بيستبعد إن يكون دة سبب الهبوط، دة لإن الزيادة المتوقعة في سعر الفايدة معروف إنها مؤقتة، وكمان هتكون جاية مع مرونة أكبر في سعر الصرف، تمهيدًا للحصول على قرض صندوق النقد.
“جنينة” قال إن موجة البيع اللي حصلت بتعكس إهتمام السوق بالتأخير اللي مش مفهوم في الوصول لاتفاقية مع صندوق النقد الدولي، والحصول على القرض المطلوب.ليه دة مهم
بعد جلسة إمبارح، EGX30 فقد 18.29% من قيمته، من بداية 2022.
