خبر بفلوس
شركة مصر للألومنيوم بتشغل بعض خلايا التصنيع اللي كانت متوقفة في الفترة اللي فاتت بسبب الأعطال، في محاولة منها لتلبية الزيادة في الطلب المحلي، دة اللي جه على لسان بعض المصادر.
معلومة كلابس
الخلية هو إسم المكان اللي بيتم فيه إنتاج الألومنيوم.
أصل الموضوع
المصادر أضافت إن الشركة بتعمل عمرات لـ 42 خلية لإصلاح الأعطال فيها، دة بالإضافة لزيادة الطاقة الإنتاجية للخلايا اللي شغالة بالفعل.
الإصلاحات دي بتتم في الوقت الحالي لتوفير الألومنيوم المطلوب في السوق، دة لإن كتير من الشركات اللي كانت تستورد الألومنيوم في عمليات إنتاجها، بقت تتجه للشركة لشراء احتياجاتها نتيجة قيود الاستيراد.
ليه دة مهم
مصر للألومنيوم بتخطط لتطوير شامل في مصنعها بتكلفة مبدئية 2.5 مليار دولار، ودة المفروض يرفع الطاقة الإنتاجية للشركة من 320 ألف طن سنويًا لـ 570 ألف طن سنويًا.
