خبر بفلوس
صفقة الاستحواذ المحتملة من سيدي كرير على المصرية لإنتاج الإيثيلين ومشتقاته “إيثيدكو”، ممكن تنتج كيان جديد هيسيطر على سوق البولي إيثيلين في مصر، وقيمته ممكن توصل 15 مليار جنيه.
في الخلفية
سيدي كرير كانت قالت إن مجلس إدارتها هينعقد علشان يبحث تعيين بنك الاستثمار “إن آي كابيتال”، ليقوم بدراسة صفقة الاستحواذ على راس مال “إثيدكو”، واللي لو هتتم فهيكون عن طريق مبادلة الأسهم.
معلومة كلابس
مبادلة الأسهم بتحصل بإن الشركة المستحوذة بتدي مساهمين الشركة المستهدفة جزء من أسهمها مقابل الجزء المطلوب الاستحواذ عليه في الشركة المستهدفة.
البولي إيثيلين بيتم استخدامه في صناعة الحاويات، الزجاجات وخزانات الوقود.
تفاصيل
المصادر قالت إن سيدي كرير معندهاش السيولة النقدية الكافية، اللي تخليها تنفذ الصفقة بالطريقة التقليدية؛ دة بسبب إن راس مال “إثيدكو” كبير وبيوصل لـ 675 مليون دولار.
ليه دة مهم
الكيان الجديد اللي هينتج عن الاستحواذ هيتميز بالتكلفة المنخفضة للإنتاج، وهيبقى ليه حصة أكبر في السوق، وهيكون ليه قوة تفاوضية كبيرة في تسعير البولي إيثيلين سواء في السوق المحلي أو الخارجي.
