منطق التسعير الآجل
عايز تشتري ١ دولار بعد سنة وخايف إن سعره يغلي من 20 جنيه النهاردة إلي سعر لا تعلمه بعد سنة.
عندك حل بسيط جدا…
اولًا، المعطيات
– سعر الاقتراض بالجنيه المصري = 15%
– سعر الفايدة علي ايداع الدولار = 4%
– سعر الصرف الحالي = 20 جنيه مقابل الدولار
ثانيًا، الخطوات
1. استلف 19.2 جنيه النهاردة بسعر فايدة 15% لسنة
2. حول الـ 19.2 جنيه لـ 96 سنت (علي سعر صرف 20)
3. أودع الـ 96 سنت في البنك لمدة سنة بـ 4% فيبقي معاك الـ 1 دولار اللي انت عايزه.
4. بعد سنة، هتسدد 22.1 جنيه = أصل القرض الـ 19.2 جنيه + الفايدة الـ 15%
يعني، في حقيقة الأمر…
بعد سنة، اشتريت 1 دولار بـ 22.1 جنيه و لكن السعر دة انت كنت عارفه مسبقًا لانه اعتمد على أسعار الفايدة.
ده السعر الآجل للدولار ونفس السعر ده بالظبط هتوصله لو عملت الحسبة اللي بتستخدم في احتساب السعر الآجل في البنوك الكبري:
USD/EGP FWD =
USD/EGP SPOT X (1 + 15%)/(1 + 4%) =
20 X 1.106 = 22.1
في القصة السابقة، ما حدث فعليًا إنه تم تخزين 96 سنت لمدة سنة وتكلفة التخزين كانت 15% (فايدة قرض الجنيه المصري) ودة يعرف بالـ (cost of carry) أو تكلفة التخزين.
و لكن، خلال العام، الـ 96 سنت زادت بـ 4 سنت لانها تدر فايدة و دة اسمه (convenience yield)، و الـ convenience yield فعليًا خفض تكلفة التخزين من 15% إلى حوالي 11%.
إذًا، استنتاجين:
1. السعر الآجل للدولار = السعر الحالي مضروب في (1 + نسبة الفايدة في مصر) مقسوم علي (1 + نسبة الفايدة في أمريكا).
2. طول ما فايدة الجنيه أعلى من فايدة الدولار، السعر الآجل للدولار هيبقى اعلى من السعر الحالي ودة مبني على معادلة وليس توقع.
