خبر بفلوس
الحكومة قررت إنها تعفي العربيات اللي بيتم استيرادها لصالح المصريين في الخارج من الجمارك والرسوم المفروضة عليها، ولكن دة هيكون قصاد دفع قيمة الرسوم والجمارك كلها كوديعة بالعملة الأجنبية يتم تحويلها لوزارة المالية.
وإيه الاستفادة من كدة؟
صاحب العربية هيتمكن من استرداد الفلوس اللي هتتحول لوزارة المالية بعد 5 سنين، ولكن بالجنيه المصري من خلال سعر الصرف المعلن عند الاسترداد، وبدون عائد.
مدة القرار دة هتكون 4 شهور بس.
إيه هي الشروط؟
في عدد من الشروط للاستفادة من القرار دة، منها إن يكون المشتري مصري عنده إقامة سارية في الخارج، وإن عمره لا يقل عن 16 سنة، وإنه يستخدم الإجراء دة علشان يشتري عربية واحدة بس.
ليه دة مهم
وزير المالية محمد معيط، قال إن القرار دة متوقع إنه يوفر 10 مليار دولار، كودائع من المصريين في الخارج.
الدولة بتحاول توفير العملة الصعبة بكل الطرق، بسبب انخفاض النقد الأجنبي نتيجة الحرب الروسية الأوكرانية.
