خبر بفلوس
شركة ماكرو جروب بتسعى لإنشاء خط إنتاج جديد في بداية 2023 هيتم تخصيصه لإنتاج السوائل، دة بجانب تخطيطها لزيادة معدلات الإنتاج بشكل عام.
أصل الموضوع
الدكتور أحمد النايب، رئيس مجلس إدارة “ماكرو”، قال إن الشركة عندها خطة للتوسع خلال 2023 وإنها تضاعف حجم إنتاجها، دة بالإضافة للعمل على طرح من 30 لـ 50 منتج جديد خلال السنة الجاية.
الشركة كمان بتستهدف زيادة حجم الصادرات، اللي بتمثل حاليًا 5% من مبيعات الشركة، علشان تستفيد من سعر الدولار. أما في الوقت الحالي، فالشركة بتطور خطوط الإنتاج الخاصة بيها، وبدأت بالخط الموجود في منطقة الكريمات.
ليه دة مهم
بحسب اللي قاله “النايب”، فشركة “ماكرو” عايزة تستفيد من أزمة الاستيراد الموجودة حاليًا، عن طريق إتاحة بعض المنتجات اللي مش موجودة دلوقتي في السوق.
