استثمر مبلغ من 500 جنيه لـ 10،000 جنيه ف ايه! استثمرهم ف مستقبلك.
هي الفلوس البسيطة دي تنفع تكون لها عائد كبير ف المستقبل! ما تقلقش. اصلا ماتحطش اي امل انها تزيد.
ماتتعشمش بدرجة كبيرة وخليك بتعمل اللي عليك وخلاص لانك اكيد ف بداية تجربتك للاستثمار ف الاسهم مش هاتكون جاهز الجاهزية اللي كتير من الناس عليها دلوقت.
تشتري اسهم ف شركة ايه!
دي تجربة شخصية جدا ومش هاينفع تاخد تجربة شخص وتمشي عليها بنسبة 100% لكن هتاخد خبرة عملية ف التداول.
الخبرة اهم من الفلوس.
ركز علي الدروس اللي انت بتستفيدها من التداول ف الاسهم ومتابعة اخبار الشركة والسوق والاقتصاد. الموضوع مش مجرد فلوس وبس لانك لو خسرت ممكن ده يقفلك خالص ومش هاتستثمر فالبورصة مرة تانية.
بعد شهر واتنين من التداول هاتكون احسن بكتير جدا وبالذات لما تتعرف علي اصدقاء من المتداولين كل يوم من البرنامج او صفحة التواصل الاجتماعي. دي حاجة لها فوايد مضاعفة ف المستقبل تساعدك تكون شخص افضل ف مجال الاستثمار ف الشركات المساهمة.
التوصية باسهم شركات معينة من الناس اللي حواليك مش شرط تكون هي احسن حاجه.
ماتقفلش محيطك علي الناس اللي حواليك لانك متوسط الخمس افراد اللي بتحوط نفسك بيهم. وسع دايرة معارفك علي قد ما تقدر بالمستثمرين الناجحين.
افتكر دايما ان مفيش فهلوه ف البورصة.
اللي مش بيعمل الواجب مابينجحش. لازم تبذل مجهود عشان توصل للنتيجة اللي عايزها. لازم تحط فلوسك ف شركة بتقدم قيمة مضافة في المجتمع عشان تلاقي عائد و زيادة المبلغ ف المستقبل وتكون فخور انك مستثمر و شريك مساهم فيها.
ماتستسلمش للخسارة بسهولة وخد فرصة مرة تانية وابذل مجهود بنفسك.
هذه المقالة ليست مكتوبة من ثاندر و ليست نصيحة استثمارية، حيث يجب عليك إجراء البحث الخاص بك، قبل اتخاذ أي قرار استثماري
