خبر بفلوس
تصنيف مصر الائتماني فضل ثابت عند BB مع نظرة مستقبلية مستقرة، دة بحسب تصنيف وكالة ستاندرد آند بورز.
معلومة كلابس
التصنيف الإئتماني بيدي لمحة عن القدرة المالية لدولة أو شركة أو شخص، علشان يقدر يسد التزاماته المالية.
أصل الموضوع
ستاندرد آند بورز قالت إن قرار التصنيف دة مدعوم بتوقعات القرض المنتظر من صندوق النقد الدولي، بالإضافة لمساعدات الدول الخليجية، واللي من خلالهم مصر هتكون قادرة على سداد التزامتها.
وكالة التصنيف العالمية بتتوقع إن قرض صندوق النقد هيكون ما بين 2-3 مليار دولار، دة بالإضافة لـ 2-3 مليار دولار تانيين من المستثمرين في سوق السندات الدولية.
ليه دة مهم
الحكومة رحبت بقرار تثبيت التصنيف الإئتماني لمصر، واللي بيدل على قوة وصلابة الاقتصاد المصري.
ودلوقتي؟
ستاندرد آند بورز قالت إن الإصلاحات الحكومية في مصر، وتوقعات النمو القوي بيدل على إن مصر هتبقى قادرة على تلبية احتياجاتها من التمويل الأجنبي، واللي بتوصل لـ 18 مليار دولار، خلال عام 2022/2023.
