ايه هو التعويم ؟
قبل ما نتكلم علي معني التعويم لازم الأول نعرف انظمة ادارة ال foreign exchange أو بالبلدي ادارة سعر العملات الأجنبية و خصوصا الأخضر منه
الحقيقة فيه انظمة كتير لكن انا هركز علي نوعين و اي نوع اخر هنلاقيه انه بين النوعين دول
مش فاهم ؟
خلينا نبتدي نشرح النوعين و هتفهم قصدي.
اول نوع اسمه fixed exchange rate بمعني ان البنك المركزي مثبت سعر العملة مع عملة تاني غالباً بتبقي الدولار
يعني فالنفرض مثلا ان السعودية مثبته ان الدولار يساوي حوالي 3.75 ريال سعودي
مش هتكلم عن طريقة التثبيت و لكن خلينا نقول انه بيتم عن طريق ان الدولة (اللي هي في المثال بتاعنا السعودية) بتوفر احطياتي نقدي من العملة الأجنبية (الدولار) اللي عن طريقة بتقدر تثبت بيه سعر الصرف و طبعا السعر مبيبقاش متثبت بمسامير , يعني يمكن انه يتحرك في حدود 1% زيادة او نقصان
لكن في العموم نقدر نقول ان سعر الصرف تقريبا فعلا “ثابت” و ده بيبقي سببه اتفاقايات دولية او تجارية بين بلدين
علي الناحية الثانية النوع التاني اسمه Independently/free floating rates بمعني التعويم المستقل الدائم للعملة امام اي عملة تاني
يعني الدولة بتسيب العملة للأمواج و العرض و الطلب , يعني مثلا الدولار الكندي امام نظيرة الأمريكي
النهارده الدولار الأمريكي بيساوي 1.25 دولار كندي مثلا , بكره يساوي 1.34 بعده يساوي 1.14 , براحته , يبقي زي ما يبقي طبقا لقوي العرض و الطلب
طيب هل فيه انواع ادارة سعر الصرف اخري؟
الحقيقي فيه كتير لكن كلهم يقعوا ما بين ال fixed exchange rate و ال Independently/free floating rates.
مثلا فيه طريقة ادارة اسمها Managed float , بمعني ان البنك المركزي او الدولة تسيب عملتها لقوي العرض و الطلب لكن لحد معين
يعني هنسيب مثلا الجنيه المصري لقوي العرض و الطلب إلي ان يصل الدولار 30 جنيه , في اللحظة دي يتدخل اصحاب السياسات المالية في مصر بضخ دولارات في السوق اللي تخلي الدولار ميعديش ال
30 جنيه (و ده مجرد مثال , مش معناه ان دي سياسة الحكومة المصرية كده فعلا)
اعتقد عزيزي القارئ انك فهمت اذاي البنوك المركزية بتدير مسئلة ال exchange rate او سعر العملات الأجنبية
و كمان و انت في طريقك لفهم الحكاية دي , فهمت يعني ايه تعويم أو يعني ايه تعويم محكوم
ندخل بقي علي تأثير التعويم او خفض العمله:
الحقيقة ان محدش يقدر يقول ان التعويم او خفض قيمة العملة مفيد او مضر بشكل مجرد , هو مفيد و مضر
و علي حسب اقتصاد كل دولة يصبح التعويم اكثر فائده احياناً و اكثر ضرراً احياناً
لكن خلينا نعرض الصورة كاملة ببساطة
التعويم بيخفض قيمة العملة المحلية امام العملات الأجنبية و ده طبعاً بيقلل قيمة مدخرات الأفراد و حتي قيمة أجورهم و ممكن يعرض الدولة لزياده في التضخم
و التضخم يا عزيزي هو ضعف القوة الشرائية للعملة المحليه , يعني لو الجنية بيشتري خمس سلع بعد التعويم ممكن يشتري 4 او 3 من نفس نوع السلع
علي الناحية الأخري التعويم بيجعل اسعار المنتجات المستورده غالية و بيخلي عائد التصدير اكبر , فنقدر نقول بشكل نظري ان التعويم يزيد الصادرات و يقلل الواردات
لكن لو عملنا zoom in علي بعض الدول النامية هنلاقي ان التصدير اللي الدول دي بتصدرة بيعتمد علي مكونات انتاج اصلا بيتم استيرادها بالعملة الصعبة و بالتالي فالتعويم ممكن يقلل الأنتاج و يخليه اصعب او يخلي اصحاب الاسثمارات اللي من النوع ده يعملوا تسريح للموظفين لتقليل تكلفة الأنتاج علشان مكونات الأنتاج و الماكينات بقت اغلي
لكن فالنفرض مثلا ان دولة زي ألمانيا (علي فرض ان لديها عملتها و علي فرض انها ليست جزء من الأتحاد الأوروبي) قررت انها تعوم عملتها , في الحالة دي معظم مكونات الأنتاج محلية و الماكينات محليه , فالتعويم هيخلي المنتاجات الألمانية تباع بسعر منافس في الاسواق العالمية و الأقتصاد غالباً هينتعش
نيجي بقي لتأثير التعويم علي البورصة
احنا عارفين ان الأسهم دي هي عبارة عن جزء من الأصول الشركات المطروحة في البورصة , بمعني ان مثلا لو شركة ما طرحت مليون سهم و انت اشتريت سهم , كده يبقي انت بتملك واحد علي مليون من اصول
الشركة دي كلها
و زي ما قولنا ان التعويم بيزود التضخم , و ده معناه ان سعر السهم هيزيد نظريا , بمعني ان سعرة كرقم هيزيد ولكن ليس قيمته
طيب ده حلو ولا وحش , هو اكيد حلو ان فلوسك لو في البورصة و في أصول (تم تسعيرها بشكل عادل) , بعد التعويم ستحافظ مدخراتك او استثماراتك علي قيمتها , علي عكس لو كنت سايب المدخرات دي في البنك او دون استثمار
علي الناحية الاخري لو تعثرت الشركات اللي حضرتك بتمتلك سهم فيها , بسبب التعويم و صعوبة توفير مكونات الأنتاج (اذا كانت مستورده) , ده معناه ان ارباح الشركة هتقل و مع الوقت الشركة دي السهم بتاعها قيمته و سعره هيقل.
خلاصة الكلام , الأقتصاد القوي يحصد فوائد اكثر من قرار التعويم اكثر من الأقتصاد الضعيف
هذه المقالة ليست مكتوبة من ثاندر و ليست نصيحة استثمارية، حيث يجب عليك إجراء البحث الخاص بك، قبل اتخاذ أي قرار استثماري
