خبر بفلوس
أعلنت شركة بلتون عن تسجيلها خساير بحوالي 140 مليون جنيه خلال الـ 9 شهور الأولى من 2022، بالإضافة إلى موافقة مجلس الإدارة على زيادة راس المال بقيمة 10 مليار جنيه.
نتائج الأعمال
إيرادات الشركة خلال نفس الفترة قلت بنسبة 5% تقريبًا، وسجلت حوالي 125 مليون جنيه.
من القوايم المالية للشركة، لقينا إن من الأسباب الرئيسية لتسجيل الخساير، هو ارتفاع مصروفات الشركة على الفوايد زادت بنسبة 60% تقريبًا، ووصلت لـ 100.7 مليون جنيه.
زيادة راس المال
مجلس إدارة الشركة قرر زيادة راس المال من 926.9 مليون جنيه لـ حوالي 10.92 مليار جنيه، وهتكون موزعة على 5 مليار سهم، بقيمة إسمة 2 جنيه لكل سهم.
الشركة وضحت إن الزيادة هتكون عن طريق الاكتتاب النقدي، من خلال دعوة المساهمين القدامى للاكتتاب.
ليه دة مهم
الشركات المساهمة بتلجأ لزيادة راس المال لأسباب كتيرة زي التوسع في نشاط وأعمال الشركة.
لازم تعرف
في مصادر كشفت عن استقالات للموظفين بتحصل دلوقتي في بلتون، ودة بسبب عدم اهتمام الشركة الأم “شيميرا” بتطويرها، بعد الاستحواذ عليها.
ودلوقتي؟
قرار مجلس إدارة بلتون بزيادة راس المال لازم يتوافق عليه من الجمعية العمومية للشركة، بالإضافة للرقابة المالية علشان يتم تنفيذه.
