خبر بفلوس
إمبارح كان في اجتماعين لمحافظ البنك المركزي، واحد مع مع رئيس الوزراء ” مصطفى مدبولي”، والتاني كان مع رؤساء كل البنوك العاملة في مصر، ودة لمناقشة موضوعات رئيسية وتحديد خطة العمل اللي جاية.
الاجتماع مع رئيس الوزراء
من ضمن نتايج الاجتماع مع رئيس الوزراء كان استمرار التنسيق بين الطرفين بخصوص إتاحة البنك المركزي للعملة الصعبة المطلوبة لتدبير السلع الأساسية، والتركيز على أهمية ملف زيادة الاحتياطي النقدي الأجنبي كأولوية.
الاجتماع مع رؤساء البنوك
في خلال الاجتماع دة، تم توجيه مديري البنوك علشان يكون في مرونة أكبر في الإيداعات الدولارية، ودة من خلال تأسيس أوعية ادخارية للمصريين بالخارج، زي ما حصل في مبادرة السيارات الأخيرة.
الاجتماع ركز كمان على تحقيق الاستفادة من السياحة من خلال مناقشة إزاي ممكن يتم إلزام المستثمرين في القطاع السياحي بإيداع إيراداتهم بالدولار في حسابات شركاتهم في البنوك المحلية، مقابل توفير تسهيلات تمويلية ليهم.
كمان تم تمديد مهلة البنوك، في إن يكون 25% من محفظة القروض عندها تكون موجهة للمشروعات الصغيرة والمتوسطة، علشان تنتهي المهلة في ديسمبر 2023.
ليه دة مهم
البنك المركزي هو المسؤول عن إدارة الاحتياطي الأجنبي للدولة وإنه يشتغل كمصرف للحكومة، دة بالإضافة إلى إن الحكومة بشكل عام بتشتغل على توفير العملة الصعبة بكل الطرق، واللي منها تأسيس شركة جديدة لاستثمار مدخرات المغتربين.
ودلوقتي؟
من ضمن الخطوات اللي جاية، هيكون دراسة آلية تسعير الجنيه، وربطه بسلة عملات مختلفة.
