خبر بفلوس
الحرب الروسية الأوكرانية عملت أزمات كبيرة في قطاع الطاقة في أوروبا، ولكن دة ممكن يشكل فرص تستفيد منها الشركات المدرجة المتخصصة في الأسمدة.
أصل الموضوع
أزمة الغاز في أوروبا خلت الدول هناك تدي أولوية أكبر لتوجيه الغاز للتدفئة، واللي بدوره أدى لضعف إمداد الشركات الصناعية بالغاز، ودة بالإضافة لصعوبة عملية نقل الأسمدة بين الدول بسبب أزمة سلاسل الإمداد.
علشان كدة، المحلل الاقتصادي هاني جنينة بيقول إن الاستثمار في أسهم إنتاج الأسمدة فرصة لعائد كبير، دة مش بس علشان أسعار تصدير منتجاتها ارتفعت، لأ وكمان علشان الزيادة الكبيرة المتوقعة في الإنتاج.
ليه دة مهم
“جنينة” قال إن أسهم زي أموك والقلعة هيشهدوا استفادة على المدى القصير من الزيادة السعرية القادمة.
ودلوقتي؟
فيه محللين كمان بيقولوا إن في حالة ظهور عجز كبير في إنتاج الأسمدة في أوروبا، هينتج عنه استفادة كبيرة في أسهم زي أبو قير للأسمدة وموبكو.
