خبر بفلوس
بالرغم من إن السعر الرسمي للدولار هو حوالي 24 جنيه، إلا إنه بيوصل لـ 36 جنيه في السوق السوداء، دة اللي قالته جولدمان ساكس، ودة اللي لو استمر فالاقتصاد هيدخل في نفق مظلم، فإيه هي أسباب دة، وإيه اللي ممكن يتعمل؟
أصل الموضوع
تقرير المؤسسة العالمية قال إن السبب الرئيسي لكدة هو عدم وجود سيولة بالعملة الصعبة، بسبب تدفق الاستثمارات لخارج مصر بعد الحرب الروسية الأوكرانية، بالإضافة للعجز في ميزان المدفوعات المصري، اللي بيعني الاستيراد أكبر من التصدير.
وبالرغم من كل دة، التقرير بيقول إن برنامج صندوق النقد الدولي هيوفر الحماية لمصر، وإن من ضمن أهداف البرنامج دة هو الوصول لسعر عادل للجنيه.
ليه دة مهم؟
التقرير بيتوقع إن البنك المركزي هيتدخل عن طريق ضبط سعر الجنيه للوصول لسعره العادل، ولكن دة هيتوقف على كمية العملة الصعبة الموجودة حاليًا.
التقرير كمان بيشير لاحتمالية اجتماع مفاجئ من البنك المركزي لزيادة سعر الفايدة بأكتر من 1%، ودة هيكون علشان يشجع تدفق الأموال لمصر.
ودلوقتي؟
اجتماع صندوق النقد الدولي بخصوص مناقشة قرض مصر هيكون يوم 16 من الشهر الجاري، والاجتماع الرسمي للبنك المركزي هيكون يوم 22 ديسمبر 2022.
