خبر بفلوس
مصر بتخطط لفرض ضريبة جديدة بنسبة على أصحاب الدخل المرتفع، بالإضافة لإعفاء المستثمرين في البورصة من ضريبة الأرباح الرأسمالية اللي لم تسدد في 2022، بحسب وثيقة حكومية اطلعت عليها الشرق.
أصل الموضوع
الضرايب الجديدة اللي الحكومة بتخطط لفرضها هتكون بنسبة 27.5% على الأشخاص اللي قيمة دخلهم بتتعدى 800 ألف جنيه في السنة.
الخطة كمان بتشمل عدم إلزام المستثمرين في البورصة بضريبة الأرباح الرأسمالية اللي لم يتم سدادها في خلال الفترة من يناير 2022 وحتى تطبيق التعديل على القانون.
لازم تعرف
أكبر ضريبة على الأفراد مطبقة حاليًا هي بنسبة 25%، وبتكون على اللي بيزيد دخلهم السنوي عن 400 ألف جنيه، أما ضريبة الأرباح الرأسمالية فبتكون ضريبة على الأرباح الناتجة من الأسهم المباعة.
ليه دة مهم
المحللين بيقولوا إن الحكومة بتتوسع في فرض الضريبة علشان تقلل العجز في موازنتها، واللي فيها بتكون المصروفات أكبر من الإيرادات.
كمان فرض ضريبة أعلى على أصحاب الدخول المرتفعة، هو نوع من أنواع العدالة الاجتماعية.
ودلوقتي؟
التعديلات الجديدة دي لازم تاخد موافقة مجلس النواب، وبعدها موافقة رئيس الجمهورية قبل تطبيقها المتوقع في يناير 2023.
