هو ده السؤال اللى شاغل بالنا كلنا دلوقتى
الاجابة المختصرة البسيطة هى ان غالبا أه خلاص خلاويص أحنا كده فى قمة موجة التضخم ولو لسه فاضل فالباقى بسيط بأذن الله.
تعالى أقولك أنا بقول كده ليه.
التضخم ناتج عن سببين (خارجى / داخلى)
خلينا فى نفسنا الاول (السبب الداخلى) اللى هو انخفاض قيمة الجنيه المصري.
– التجار بيسعروا السلع بناء على سعر الدولار💲 فى السوق الموازية، يعنى اللى بندفعه حاليا متسعر بناء على كده
– قرار البنك المركزى بتخفيض قيمة الجنيه هدفه القضاء على السوق الموازية
– لو تم توفير الدولار بالسعر العادل – أقل من سعر السوق الموازية -، ده هيخلى سعر السلع والمنتجات يقل بناء على السعر الرسمى مع دورة رأس المال القادمة (اللى بتاخد من 3 الى 6 شهور)
– يعنى لما التجار يشتروا منتجات جديدة هيبدوء يسعرو بالسعر الجديد وده هيفخض قيمة السلع
– كلامى مبنى على السيناريو اللى حصل مع تخفيض قيمة العملة فى سنة 2016 – ممكن تراجع اللى حصل وقتها
طيب بالنسبة لل (السبب الخارجى) أيه اللى أتغير، شوف ياصديقى أهم 3 أسباب مؤثرة فى التضخم العالمى هم.
– نسب التضخم فى الولايات المتحدة الامريكية (ناتج عن ضخ تريلونات الدولارات أيام كرونا)
– قلة المنتجات اللى فى السوق (ناتج عن اغلاقات المصانع والشركات بالصين للحد من انتشار كرونا)
– أرتفاع سعر المنتجات الاوربية (ناتج عن رفع أسعار الطاقة نتيجة الحرب الروسية)
بخصوص أمريكا فأخر تقرير اللى طلع من أيام بيقول أنه نسب ارتفاع الاجور قلت.
يعنى ببساطة ابتدو يتحكمو فى نسب التضخم وهيخفضو معدل رفع الفوايد.
الخبر ده جيد للاسواق الناشئة كلها اللى مصر واحدة منها.
بخصوص أوربا بقى ياصديقى
– الاخبار من المانيا أن نتايج القطاع الصناعى لوحظ فيها تتحسن يعنى العجلة ابتدت تدور
– زيادة أسعار الطاقة علشان الحرب مأثرة على سعر السلع (أنا عارف أن الحرب مخلصتش)
– أحنا دلوقتى فى نص الشتا ❄يعنى خلاص التسعيير تم ولو مافيش مستجدات فى الحرب مع دخول الصيف ممكن أسعار الطاقة تقل
– وده لو حصل معناه أن أسعار السلع والخدمات هيقل
بخصوص قفل المصانع والشركات بالصين
– كان فى خبر من أسبوعين تقريبا أنه تم تخفيض قيود الاغلاقات
– الخبر ده خبر ايجابى للعالم، لأن معناه أن المعروض بالسوق العالمى هيزيد تانى
-يعنى أسعار السلع هتبدء تقل مع الوقت
طيب متوقع علشان نحس بالفرق ناخد وقت قد أيه.
هقولك أنا مش خبير أقتصاد بس فهمى البسيط بيقوللى أننا هنحس بتحسن على نص 2023
هذه المقالة ليست مكتوبة من ثاندر و ليست نصيحة استثمارية، حيث يجب عليك إجراء البحث الخاص بك، قبل اتخاذ أي قرار استثماري
