خبر بفلوس
رئيس البورصة رامي الدكاني، حدد 5 محاور رئيسية بتعتمد عليهم البورصة المصرية في استراتيجيتها خلال 2023، واللي بيها البورصة هتكون قادرة تكمل مسارها الصعودي، بحسب أموال الغد.
المحاور الأساسية:
- العمل على جعل مصر المركز الرئيسي لتداول شهادات الكربون في أفريقيا
- محاولة زيادة أحجام التداول من خلال تفعيل آلية جديدة للتداول، واللي بالتالي دة هيزود السيولة
- الاعتماد على خطة ترويجية تستهدف المستثمرين والصناديق أصحاب الملاءة المالية الكبيرة
- جذب شركات جديدة لتكون ضمن برنامج الطروحات وتحفيز قيدها في البورصة
- توسع البورصة من خلال تأسيس أسواق جديدة للمشتقات المالية والسلع
لازم تعرف
سوق المشتقات المالية بيتم فيه تداول أوراق مالية زي العقود المستقبلية والعقود الآجلة، اللي بتستخدم في تحديد أسعار السلع في المستقبل.
ليه دة مهم
الدكاني قال إنه خلال الربع الاول هيتم التجهيز لـ 4 مؤتمرات ترويجية للبورصة والسعودية هتكون أول المستهدفين، سوق الكربون كمان هيتم الترويج ليه خلال السنة دي، والتداول فيه هيبدأ في 2024.
ودلوقتي؟
إطلاق بورصة المشتقات المالية هيكون خلال النصف الثاني من 2023.
