الاول نقول بسرعة وببساطة ايه الفرق بين التضخم والركود التخضمى.
التضحم: فقدان القوة الشرائية بمرور الوقت يعنى كمية الفلوس الي معاك النهاردة مش هتشترى نفس المنتج أو الخدمة اللى كانت بتشتريها قبل كده.
الركود التضخمى: يعبر عن (ركود + تضخم) ضعف نمو الاقتصاد وارتفاع معدل البطالة + نسب التضخم، يعنى ببساطة الاسعار تزيد وكمان فرص الشغل تقل والمصانع والشركات تقلل انتاجها أو تقفل.
هو التضخم بيحصل ليه؟
أى نظام أقتصادى هدفه تدوير الفلوس وعدم اكتنازها علشان يوفر فرص عمل فهو بيقلل قيمة الفلوس علشان يبقى الافضل ليك هو استثمرها او تشترى اللى محتاجه بسعر النهاردة بدل ما تشتريه بسعر أغلى بكره
هل وصلنا لقمة التضخم فى مصر؟
وجهة نظرى أننا ياما وصلنا أو اللى فاضل بسيط ممكن تقرأ وجهة النظر كامة فى مقالتى بعنوان (التضخم خلاويص ولا لسه)
هل ممكن يحصل ركود تضخمى؟
الاحتمال موجود علشان الاسباب الجاية:
- القيمة الشرائية للفلوس مع الناس قلت جدا فده هيقلل الطلب ودى تعتبر المرة 3 اللى بيتخفض قيمة الفلوس خلال سنة يعنى 3 ضربات قوية لقيمة الجنيه
- فوايد الشهادات بتزيد وبعض الموؤسسات الاقتصادية بتتوقع أن مصر ترفع معدل الفوائد تانى
- تصريح رئيس الوزراء بعدم بدء أى مشروعات قومية جديدة مقومة بالدولار مباشرة =تخفيض فرص العمل
- تصريحات الحكومة بتوفير الانفاق الحكومى
هل ممكن نهرب من حالة الركود التضخمى المتوقعة؟
اعتقادى الشخصى ممكن لو تم تنفيذ اشتراطات صندوق النقد بتقليل دور الدولة ده ممكن يشجع المستثمرين أنهم يعملو استثمارات حقيقة (مش أموال ساخنة بس) يعنى هنوفر فرص عمل.
ايه الاحتمال الاوقع؟
محدش يقدر يجاوبك علشان الموضوع متوقف على الاجراءات اللى هتخدها الدولة أثناء تنفيذ اشتراطات صندوق النقد
أمتى أتاكد أنه حصل ركود تضخمى؟
انخفاض معدل النمو الاقتصادى ربعين ماليين متتاليتين هو التأكيد على حدوث ركود اقتصادى ولما يكون معاه زيادة قيمة السلع يبقى كده أتأكد مرحلة الركود التضخمى
يعنى الموضع علشان يكون مؤكد محتاج وقت، طبعا فى دلالات بتبان فى السوق خلال السنتين
تتصرف ازاى لو حصل ركود تضخمى أو فى احتمالية لحدوثه
- تقلل الديون اللى عليك او تقفلها فى أسرع وقت
- تدور على فرص عمل Freelance توفر ليك دخل تانى
- تقليل النفقات غير الضرورية
- بيع الاشياء القديمة والغير مستغلة لتوفير سيولة
- تحافظ على قيمة مدخراتك، والافضل للمحافظة على المدخرات حسب رؤيتى هو:
- الذهب (سبائك، جنيهات)
- صناديق الاستثمار لو معندكش خلفية مناسبة عن البورصة ولو فى خلفية يبقى التعامل مع الاسهم مباشر
- شهادات الادخار
ملاحظة: لو مستثمر طويل الاجل يبقى فترات الركود الاقتصادى بتكون الفترات الانسب لتكوين مراكز مالية علشان بتكون قيم الاسهم منخفضة بس علشان تعمل ده محتاج تتعلم كويس تقيم الاسهم ازاى وكمان محتاج تأكيد انه بيحصل ركود اقتصادى.
هذه المقالة ليست مكتوبة من ثاندر و ليست نصيحة استثمارية، حيث يجب عليك إجراء البحث الخاص بك، قبل اتخاذ أي قرار استثماري
