خبر بفلوس
رئيس هيئة الرقابة المالية الدكتور محمد فريد، قال إنه في حزمة تعديلات جديدة على عملية اقتراض الأوراق المالية بغرض البيع “الشورت سيلنج”، واللي منها هيكون تأسيس وعاء تسليف مركزي ليحل محل الآلية الحالية.
لازم تعرف
اقتراض الأسهم بغرض البيع هي آلية بيع بيستخدمها المستثمر لو توقع إن في سهم هينزل، ساعتها بيقترض السهم دة ويبيعه بسعره الحالي، على أمل إنه يشتريه بسعر منخفض بعدين ويرجعه لمالك السهم مع فائدة محددة تمثل تكلفة اقتراضه للسهم.
أصل الموضوع
في الوقت الحالي، المستثمراللي عايز يستخدم عملية “الشورت سيلنج” لازم يتعاقد مع أمين الحفط والسمسار على السهم اللي هيتم استخدام “الشورت سيلنج” عليه، والآلية الجديدة هتتيح للمستثمرين الوصول للسهم اللي هينفذوا عليه الشورت سيلنج بدون الاتصال لأمناء الحفظ أو شركات السمسرة.
ليه دة مهم
“الشورت سيلنج” بيتيح للمستثمرين إمكانية تحقيق أرباح مع توقعات هبوط السوق، ولكن فيه مخاطرة إنك تخسر أكتر من 100% من حجم استثماراتك، لإن لو توقعاتك بهبوط السهم مكانتش صحيحة والسهم ارتفع، مفيش أي حدود لارتفاعه.
ودلوقتي؟
حاليًا فيه 66 ورقة مالية في البورصة المصرية مؤهلين للتطبيق آلية الشورت سيلنج.
