خبر بفلوس
وكالة فيتش توقعت انخفاض الجنيه قصاد الدولار بشكل أكبر في النص الأول من 2023 وتسجيل الدولار 33 جنيه، ودة قبل ما سعر الدولار يستقر عند 30 جنيه بنهاية السنة.
أصل الموضوع
فيتش قالت إن انخفاض الجنيه خلال الأسابيع المقبلة هيكون بسبب النقص في العملة الأجنبية، وإن من أسباب التراجع المستمر في الجنيه هو إن البنك المركزي ملتزم بسعر صرف مرن، ولكن بشكل تدريجي تجنبًا لحدوث تراجع قوي في قيمة العملة.
ليه دة مهم
التقرير قال إن استقرار الدولار عند 30 جنيه بنهاية السنة هيكون بسبب إن الأصول المملوكة للدولة هيكون فيها تطور سريع في النص التاني من 2023، بالإضافة للتدفقات المتزايدة من العملة الصعبة.
وبحسب التقرير، احتمالية وجود زيادة أكبر في قيمة الجنيه هتكون ضعيفة، بسبب المخاوف من حدة الركود في الولايات المتحدة وأوروبا.
ودلوقتي؟
فيه تقارير تانية توقعت انخفاض قيمة الجنيه قصاد الدولار على المدى القصير، وبعدها ارتفاع قيمة الجنيه مرة تانية على المدى الطويل، كريدي سويس كانت توقعت تسجيل الدولار لـ 35 جنيه، قبل ما سعر الدولار يبقى 28 جنيه خلال 12 شهر.فيتش كمان خفض توقعاتها لنمو الاقتصاد المصري من 5.2% لـ 4.3%، بسبب ارتفاع التضخم، اللي قالت إنه هيسجل في المتوسط 25.9% خلال 2023.
